"Рускай мове дай разгрузку, размаўляй па-беларуску!" – пад такім дэвізам у Праскурнянскай сярэдняй школе прайшлі мерапрыемствы, прысвечаныя Дню роднай мовы.

Як расказала журналісту ndsmi.by намесніца дырэктара па выхаваўчай рабоце, настаўніца беларускай мовы і літаратуры Вера Трубілава, цэлы дзень дзеці стараліся размаўляць на беларускай мове не толькі на занятках, але і на перапынках. "Мы хочам, каб нашы вучні разумелі, што беларуская мова – гэта не толькі прадмет у школе, але і частка нашай ідэнтычнасці і культуры. Праз мову мы перадаём гісторыю, традыцыі і каштоўнасці нашай краіны," – падкрэсліла педагог.

Вучні 5-6 класаў паказалі свае веды ў цікавай квэст-гульні "З мовай змалку сябрам будзь", дзе было прапанавана выканаць розныя заданні, звязаныя з беларускай мовай і культурай. Гульня стала не толькі забавай, але і магчымасцю для вучняў паглыбіцца ў беларускую спадчыну.

А вучні 9-11 класаў прымалі актыўны ўдзел у "Алімпійскіх гульнях" па беларускай мове, дзе дэманстравалі свае навыкі ў розных конкурсах — ад граматыкі да літаратурных ведаў. "Гэтыя мерапрыемствы дапамагаюць старшакласнікам не толькі замацаваць веды, але і развіць дух каманднай работы. Мы бачым, як з кожным годам цікавасць да роднай мовы ўзрастае," – адзначыла Вера Трубілава.

Такім чынам, свята прайшло ў атмасферы радасці і захаплення, а вучні змаглі яшчэ раз усвядоміць важнасць роднай мовы і яе захавання. "Мы спадзяёмся, што такія мерапрыемствы стануць традыцыяй, і нашы вучні будуць з гонарам размаўляць па-беларуску заўсёды," – падсумавала педагог.