Жлобінскі раённы
выканаўчы камітэт

У Жлобіне працягваецца прыём грамадзян, які ў рамках адзінага дня прыёму грамадзян членамі верхняй палаты Парламента ў Гомельскай вобласці, праводзіць спікер Наталля Качанава.

Пастаянныя падтапленні з-за грунтавых вод – прычына, па якой на прыём да Наталлі Качанавай прыйшла жыхарка вуліцы 2-й Зялёнай Жлобіна Святлана Петрусева. Яна прадэманстравала парламентарыю відэафрагменты, знятыя ў яе доме і на ўчастку, дзе ўвесь час стаіць вада. Праблема ўжо 17 гадоў датычыцца не толькі яе домаўладання, але і ўсіх бліжэйшых. Раённым уладам сітуацыя вядома: неаднаразова камісія абследавала мясцовасць і абмяркоўвала варыянты вырашэння пытання. Але пакуль, на жаль, праблема не вырашана: жыллё непрыдатнае для жыцця, а ўчастак - для вядзення гаспадаркі.

Жанчына выхавала чацвярых дзяцей і сёння дапамагае старэйшай дачцэ ў выхаванні траіх унукаў:

- Хацелася б дарыць дзецям радасць, а не клапаціцца наконт водаадвядзення і водапаніжэння, - адзначыла заяўніца.

- Раз абяцалі чалавеку, трэба зрабіць. Прадумайце крыніцы фінансавання. Трэба зрабіць праектна-каштарысную дакументацыю з улікам усіх нюансаў, - звярнулася да мясцовай улады Наталля Качанава.

З просьбай правесці рамонт дарогі па вуліцы Таварнай на прыём да старшыні Савета Рэспублікі прыйшла жлабінчанка Раіса Шаламава. Кіраўнік Жлобінскага раёна Сяргей Ярэц адзначыў, што пытанне з добраўпарадкаваннем дарог вырашаецца паступова, дойдзе чарга і да Таварнай.

- Распрацуйце праграму па добраўпарадкаванні "Гарадская ўскраіна" або "Прыватны сектар". Усюды жывуць людзі, яны маюць права на камфортныя ўмовы. Сітуацыя з бюджэтнымі сродкамі зразумелая. Магчыма, варта падключаць не толькі бюджэт, але і ЖКГ, і сродкі людзей. Сфарміраваць праграму на пяцігодку і рэалізоўваць яе. Людзі будуць бачыць вынік, будуць удзячныя, - падкрэсліла старшыня Савета Рэспублікі.

Шматдзетная маці Людміла Новікава, якая пражывае ў 11-павярховым доме па вуліцы Казлова, паскардзілася на цвіль і волкасць, наяўнасць якіх можа адбіцца на здароўi яе малых:

- Мясцовыя ўлады ведаюць маю праблему, камісійна праводзілі абследаванне. Не факт, што прапанаванае ўцяпленне дома дапаможа вырашыць пытанне.

- Запрасіце спецыялістаў і высветліце прычыну ўзнікнення цвілі. Я ведаю не па чутках, якая гэта праблема, і якія могуць быць наступствы. Галоўнае, прыняць правільнае рашэнне, каб не патраціць сродкі марна, - зарыентавала мясцовыя ўлады Наталля Качанава.

ndsmi.by