03.05.2024 На мемарыяле "Дзецям - ахвярам вайны" ў Чырвоным Беразе адбыліся памятныя мерапрыемствы
Сёння, 3 мая, у Жлобінскім раёне будзе адкрыты яшчэ адзін буйны малочнатаварны комплекс - "Новы Цупер", размешчаны ў СПУ "Антонаўка-Агра" - сельскагаспадарчым філіяле РВУП "Гомельаблгаз".
Для ўдзелу ў гэтай урачыстай цырымоніі ў наш раён ужо прыбылі намеснік кіраўніка Урада Беларусі Пётр Пархомчык, міністр энергетыкі Віктар Каранкевіч, старшыня Гомельскага аблвыканкама Іван Крупко.
Свой працоўны візіт на Жлобіншчыну госці пачалі з наведвання мемарыяльнага комплексу "Дзецям - ахвярам вайны" ў Чырвоным Беразе, усклаўшы тут жывыя кветкі і ўшанаваўшы памяць ахвяр генацыду хвілінай маўчання.
Дарэчы, і на гэтым аб'екце зараз ідуць будаўнічыя работы. У год 80-годдзя вызвалення Беларусі ад нямецка-фашысцкіх захопнікаў тут вядзецца маштабная рэканструкцыя.
На гэтым святым для кожнага беларуса месцы віцэ-прэм'еру Пятру Пархомчыку, міністру энергетыкі Віктару Каранкевічу, а таксама генеральнаму дырэктару ААТ "БМЗ -
кіруючая кампанія холдынгу "БМК", дэпутату Гомельскага абласнога Савета дэпутатаў Дзмітрыю Корчыку губернатар вобласці Іван Крупко ўручыў юбілейныя знакі "80 гадоў вызвалення Гомельскай вобласці ад нямецка-фашысцкіх захопнікаў".
У цырымоніях, якія адбыліся на мемарыяле ў Чырвоным Беразе, прыняў удзел старшыня Жлобінскага райвыканкама Сяргей Ярэц.