Жлобінскі раённы
выканаўчы камітэт

На 8-й сесіі Жлобінскага раённага Савета дэпутатаў, якая адбылася сёння, 30 снежня, была заслухана справаздача кіраўніка дэпутацкага корпуса раёна Валянціны Няхай аб рабоце раённага Савета дэпутатаў і яго органаў у 2024 годзе, прыняты раённы бюджэт на 2025 год, унесены змяненні ў шэраг раённых дзяржаўных праграм, адобраны план работы раённага Савета дэпутатаў і яго органаў на першае паўгоддзе 2025 года.

У рабоце сесіі прынялі ўдзел старшыня Гомельскага абласнога Савета дэпутатаў, член Савета Рэспублікі Нацыянальнага сходу Рэспублікі Беларусь Кацярына Зянкевіч, старшыня раённага выканаўчага камітэта Сяргей Ярэц, парламентарый Аляксандр Малабіцкі, дэпутаты абласнога Савета дэпутатаў галоўны ўрач Жлобінскай ЦРБ Яўген Тапчы і дырэктар філіяла КВУП "Гомельводаканал" Валерый Верамейчык.

У сваёй справаздачы старшыня райсавета дэпутатаў Валянціна Няхай, у прыватнасці, адзначыла:

- Дэпутацкі корпус у адыходзячым годзе працаваў у цесным узаемадзеянні з органамі выканаўчай улады. Адной з форм такога ўзаемадзеяння з'яўляецца правядзенне Дзён сельсаветаў. У 2024 годзе яны праведзены ў Каратковіцкім, Кіраўскім і Салонскім сельсаветах. Старшынёй райсавета дэпутатаў і старшынямі сельскіх Саветаў дэпутатаў разгледжана больш за 650 зваротаў грамадзян і юрыдычных асоб. Ва ўсіх сельсаветах адбыліся Дні дэпутата. У многіх сельсаветах яскрава прайшлі раённыя святы. Стартавала "Вахта памяці". Гэтыя і іншыя мерапрыемствы накіраваны на вырашэнне пытанняў па жыццезабеспячэнні людзей, захаванне гістарычнай праўды, развіццё нацыянальных традыцый, адданне памяці абаронцаў Айчыны. Адзначана актыўнасць жлабінчан. У бягучым годзе ў раёне праведзена 152 суботнікі. 2025 год - год 80-годдзя Перамогі савецкага народа ў Вялікай Айчыннай вайне, 100-годдзя прысваення Жлобіну статусу горада. А гэта значыць, што работа раённага Савета дэпутатаў і яго органаў будзе накіравана на яшчэ больш якаснае вырашэнне жыццёва важных пытанняў.

Актыўную работу па рашэнні сацыяльна-эканамічных пытанняў дэпутатаў Жлобінскага раёна ў адыходзячым годзе, якую яны праводзілі ў цесным узаемадзеянні з органамі выканаўчай улады, адзначыла кіраўнік дэпутацкага корпуса вобласці Кацярына Зянкевіч.

– Стабільна працуючая эканоміка Жлобінскага раёна і ў цэлым Беларусі дае магчымасць паспяхова вырашаць многія задачы па паляпшэнню якасці жыцця людзей, – падкрэсліла Кацярына Анатольеўна. – Адзін са шматлікіх таму прыкладаў – адкрыццё ў 2024 годзе ў Жлобіне міжраённага кардыялагічнага цэнтра, што дазволіла ўкараніць сучасную дыягностыку кардыялагічных захворванняў у насельніцтва, эфектыўна весці прафілактыку сардэчна-сасудзістых захворванняў, зрабіць даступнай кардыядапамогу пацыентам. Зладжанасць праявілі прадстаўнічыя і выканаўчыя органы Жлобінскага раёна, у тым ліку сельскія выканкамы і дэпутаты, а таксама старэйшыны населеных пунктаў, многія мясцовыя жыхары і асабліва моладзь на ліквідацыі наступстваў урагану 14 ліпеня. Усё гэта дае ўпэўненасць, што і надалей самыя складаныя задачы ў раёне будуць паспяхова вырашацца. А гэтыя задачы ў новым 2025 годзе будуць няпростыя. Да таго ж гэта першы год чарговай пяцігодкі, старт якой таксама павінен быць паспяховым.

У сваім выступе кіраўнік Жлобінскага раёна Сяргей Ярэц даў высокую ацэнку рабоце дэпутатаў. Сяргей Барысавіч адзначыў:

- Склад раённага Савета дэпутатаў цалкам працаздольны. Ва ўзаемадзеянні з органамі кіравання яму пад сілу вырашаць любыя пытанні, дабівацца патрэбнага выніку на карысць людзей.

Раённы бюджэт на 2025 год дэпутаты зацвердзілі ў суме 260 509 805,00 руб. Бюджэт бездэфіцытны. Асноўная частка яго расходаў (больш як 80 працэнтаў) накіравана на вырашэнне сацыяльна значных пытанняў.

На сесіі таксама былі ўнесены змены ў раённыя комплексы мерапрыемстваў па рэалізацыі дзяржаўных праграм на 2021–2025 гады: "Сацыяльная абарона", "Будаўніцтва жылля", "Фізічная культура і спорт", інш.

ndsmi.by